Өрнийхөнд дорнын тухай инээдтэй, асар бүдүүлэг төсөөллийг нь эвдэж жинхэнэ ёсоор нь дорнын ертөнцийн анх удаа таниулсан хүн нь  Николо Пологийн хүү эрхэмсэг Марко Поло байжээ. Түүний таниулсан ертөнц өрнөдийнхний хувьд цоо шинэ ертөнц байжээ.Венеци хотын худалдаачин ах дүү Николо болон Маффелло нар өөрсдийн бараагаа борлуулахаар ашиг өндөртэй зах зээл хайж олохоор 1260 онд Константинполоос хүү Марко Пологоо  дагуулан гарчээ. Тухайн үед өрнөдийнхний түүхэнд өөр нэгэн ертөнцийг нээх том нээлт хийхийн эхлэл гэж мэдээгүй аж. Энэ аялал нь жирийн нэгэн наймааны аян байсан аж. Үнэтэй бараа таваар ачаалан Ижил мөрөн дээр орших Баруун Татаруудын эзэн Бэрх (Зүчийн хүү) хааны нийслэлийг зорин аялах жинчдийн даган гарах энэхүү аян нь маш ухаалаг бөгөөд ирээдүйтэй алхам болжээ. Энэ номонд Монголчуудын Татар хэмээсэн нь монголчуудын Татар аймгийн нэртэй адилхан санагдсанаас бус Библийн сударт чөтгөр шулмын дайчдыг “tartarus”  гэдгээс үүдэн  загалмайтнууд ийн нэрлэх болжээ хэмээн эрдэмтэд үздэг гэж орчуулагч өгүүлжээ. Исламын улс иргэдийн бүхэлд нь  “Сарацин” гэж нэрлэдэг ба монголын эзэнт гүрний харъя Ил хаадын улсыг “Левант” хэмээнэ. Харин Христийн шашинтнуудыг “Загалмайтан” хэмээгээд Буддын шашинтнууд болон Азийн шүтлэг бөө мөргөлтнүүдийг Idolaters (онго шүтлэгтэн) гэж нэрлэжээ. Цагаадай хаан Христийн шашны сахил хүртэж загалмайн шүтлэгтэн болжээ. Ах дүү Поло нар зорьсон газартаа хүрч, тавьсан зорилгоо амжилттай бүтээгээд нутаг буцах гэтэл 1262 онд  Бэрх хаан (Зүчийн хүү Алтан ордын хаан), Левантын хаан Хүлэг (Тулуйн хүү Левантын 1-р хаан) нарын хооронд дайн дэгдэж тэдний буцах замыг саатуулсан төдийгүй хэнд ч дийлддэггүй монголчуудын бат нягт нэгдэл задран ан цав сууж байжээ. Тэд дайны хөлөөс дайжин зугтаж, элдэв мөргөлдөөнд орооцолдохгүйн тулд тухайн үед төвийг сахиж байсан монголчуудын гуравдах эзэмшил улс болох урьд өмнө Латин хүн хөл тавьж үзээгүй Бухара хотод толгой хоргодоцгоожээ.